Beiseina (Lyrics) – Jonathan Lianhna ft. Zorema & Uncle Joe

Zorema:
Hringnun hi, ka dawn nawn fo thin;
Nundan thiam famkim awm thei maw?
Buklung iang kan inteh a,
Tlingzo awm thei lo, hringmi tan zawng,
Mahse hei hi ka hria,
Kraws chauh min timawitu, ka felna,
Ka thiam channa kim.

Chorus:
Aw unau dawn ve teh,
Hringnun tawi zia hi.
I nun tawp ni lo thleng dawn se;
Krista lo thil dang kan buaipui hian,
A tawpah awmzia an nei lo’ng.
Thian tha ber Krista chu ka lo nei ta,
Beiseina bo mahse ka tana beiseina;
Ka nun thim a ta chu engah min hruai chhuak.

Jonathan:
Hringnun hi, kan dai fuh seng lo,
Hma lam pe nlawk thei si lo chu;
Thinlung ngui ruma chau thin,
Nang leh kei hi zawng,
Kan chak lo thin;
Mahse Isua a awm.
Amah chakna zawk chuan
Nang leh kei hi min chelh reng thin.
Hmangaih tlak loh hmangaihtu,
Seol-a mutmu ka tuah pawh
Ka kianga hnai chu
Kei ka thian a ni min hmangaih a ni
Ka fel lohna nen ka pan ka hria
Misualte thian, ka tana hliam a ni.

Uncle Joe:
Hey, thihna hlimkawrh ka zawh pawn
Kalsan loh min tiam
Ka hnenah a awm dawn.
Hringnun kawng ka zawh
Sual mi beidawng ka nih a zual
Mahse Krista thu ka vawn a chin
Ka kawng chu harin lang mahse
A awl a sin.

Hey, mitkhap kar pawh ka nunah
Thu ka nei lo
A kutah ka nunna thuhruk a ni.
Ka tisa sualna zawng a khengbet,
A kinta e.
I rin phak baka hmangaihtu i nei
A hming chu Krista.

Chorus:
Krista lo thil dang kan buaipui hian
A tawpah awmzia an nei lo’ng.
Aw unau dawn ve teh
Hringnun tawi zia hi
I nun tawp ni lo thleng dawn se.
Krista lo thil dang kan buaipui hian
A tawpah awmzia an nei lo’ng.
Thian tha ber krista chu ka lo nei ta
Beiseina bo mahse ka tana beiseina
Ka nun thim a ta chu engah min hruai chhuak.

Beiseina bo mahse ka tana eng a ni
Beiseina bo mahse ka tana eng a ni

BEISEINA

Composed by: Jonathan Lianhna
Performed by: Jonathan Liahna, Zorema Khiangte, Uncle Joe

From Jonathan Lianhna, writer of Beiseina

He hla ‘Beiseina’ hi Lalpa’n February 4,2023 khan min pe a. Rawngbawlna atanga ka zin haw, chau angreng taka ka room-a ka awm laiin social media hrang hranga thu lêng vâkte ka thlirin, ka chhiar ve a, ngaihtuahna a kal thuiin, ka mihringpuiten kan mihringpui vêkte kan intehin, kan insel nasat zia ka hmu a, thinlung a khawih a ni. ‘Bùk lung iang kan inteha, tlingzo awm silo’

Keihi min selin, min teh ve nise selna tur ka ngah dan tur leh ka tlin bikloh zia ka inhmu nasa hle mai.. Hetiang ngawt kan buaipui si chuan a tawpah awmzia a awm dawnlo a ni tih a hmuh theih a, hringnun hi kan dâi fuh sêng miau silo alawm le..! Mahse, Nang leh kei hi Isua Krista zarah, Kross kaltlanga mawi leh fela lang, thiamchang ve mai kan nihna lo hlut zia hi aw..!

Ngaihtuahna a kal thui zel a, Lalpa’n min awmpui a ni tih chiang takin ka hria a, ka tingtang ka la a, Lalpa’n he hla thluk leh thu hi min pe ta a ni. Lalpa chu fakin awm rawh se..

February 20,2023 khan he hla hi ka thiante pahnih Zorema leh Uncle Joe te hriatah hian guitar nen ka sa ta a, ka rin phak bakin min lo phur puia, hla thu chham chi ‘rap’ han awm se a inhmeh kan ring ta a, ka thiamna ten a tlin silo, mahse, Lalpa’n hetiang lama theihna ‘talent’ tha tak a pêk, ka thianpa Uncle Joe hian phur takin “ka lo siam ang” a ti leh ta zela, ani pawh Lalpa’n a awmpuia, ka lungdum zawng taka mawi hian a ‘rap’ lai pawh hi a lo siamchhuak ve leh thei ta a ni..
Lalpa hi a van thra êm..

Tichuan hun a kal zel a, he hla hi Uncle Joe nena tihchhuah tuma ruahman kan ni a, Zan khat chu Zorema nen Instagram-a kan live dunna ah he hla hi kan sa fuh ta a, chumi zana he hla changkhatna a rawn sa khan ka beng a verhin a aw ‘voice’ nen inhmeh ka ti ta êm êm a, project dang kallai nei ve tho a nih avangin inthlahrung takin ka sawm ve ta râwih a, a ni’n phur taka tel a remtih ve takah chuan kan pathum hian kan lo puitlin thei ta a ni. Ka thiante pahnih chungah pawh hian thinlung takin lawmthu ka sawi mawlh mawlh e..

He hla tlawm tak hi a duh ve apiangte ta a ni a, a lo ngaithla ve tu apiangte chu a neitu kan ni nghal maia, Lalpa’n ngaithlatu zawng zawngte malsawm vek che u rawh se.